चट्यांङ पर्दा १७ किसानका १२९ भेडा मरे

जुम्ला — तिला गाउँपालिका-७ स्थित देउली पाटनमा चट्याङ पर्दा १७ किसानका एक सय २९ वटा भेडा मरेका छन् । मंगलबार दिउँसो चराइराखेको अवस्थामा भेडाको बथानमा चट्याङ परेको थियो । कुल ८ सय ३१ भेडाबाख्रा पाटन लगेकोमा १ सय २९ वटा भेडा चट्याङका कारण मरेको जिल्ला प्रहरी कार्यालय जुम्लाका प्रहरी निरीक्षक असिम हमालले जानकारी दिए ।

भेडा चराउन गएका ५६ वर्षीय लालसिंह रोकाया र २५ वर्षीय बीरबहादुर रोकाया घाइते भएपनि उनीहरुको अवस्था सामान्य रहेको प्रहरीले जनाएको छ ।

चट्याङले एकै पटक यतिधेरै संख्यामा भेडा मरेपछि किसान चिन्तित बनेका छन् । गाउँदेखि पाटन झण्डै १० घण्टाको पैदल दुरीमा पर्ने भएकोले यकिन विवरण आउन ढिलाइ भएको छ । प्रहरी चौकी रारालिहीको टोली घटनास्थलतर्फ मंगलबार नै प्रस्थान गरेपनि बुधबार बिहान मात्रै पुगेर मुचुल्का बनाएको थियो ।

हिउँदमा गाउँबस्तीमै भेडाहरु राखेर पालन गर्ने भएपनि बर्षायाममा पाटन लगेर भेडापालन गर्ने चलन छ । तिला –७ पोख्रीका भीम बहादुर रोकाया, लालसिंह रोकाया, काली बहादुर रोकाया, बीरबहादुर रोकाया, बल बहादुर रोकाया, काली बहादुर बोहोरा, नैने बुढा र राम बहादुर रोकाया लगायत १७ जनाले किसानले पाटनमा भेडाबाख्रा चराउन लगेका थिए ।

प्रहरी टोली घटनास्थल पुगेर फर्किएको छ । किसानहरुले विपतीमा परेर भेडापालनमा क्षति पुगेकोले उचित राहतको माग गरेका छन ।